Sunday, May 16, 2010

Entry 94 " Jasmine......"

Ka naupan deuh lai a kan in bul pangpar huan ka siam lai ka ngaihtuah chhuak a. Ka huan chu lian lem lo tak mai a ni, a hmun te a zim avangin. Chu ka pangpar huan zim te ah chuan pangpar chi hrang hrang tam tak ka phun pawlh vek mai thin a. Ka zing thawh leh ka sikul ban veleh hian ka tlawh ziah thin. Huan ti fai leh pangpar tui pe hian ka buai ve em em thin.

Chu ta ka pangpar huan a JASMINE pangpar bik hi ka sawi duh bik deuh. Jasmine par hi a rim a na hle mai a, a par hi a rawng var, par lian em em lo a ni. A par chhuah hi chuan in bul vel ah hian a rim hi a nam chuk thin, a par pawh hi a mawi khawp mai. Mi then khat chuan a par rim hi an ngai thei lo hle bawk. A par vul lai hi chuan a kung pum ah hian a par chhuak vek mai. Tin, keini Mizo tan phei chuan pangpar huan ah a par vul chek tih mai loh chu kan hmang uar em em lo, rose leh pangpar dang kan hman nasat ang hian.

Mahse kha Jasmin pangpar tho mai kha midang chuan nitin eizawn nan leh incheinna mawi tak a tan an lo hmang nasa em em thung lawi si. Hmang chang hre takin mawi takin an siam chhuak in an mamawh mil tur ngeiin an hmang thiam em em bawk. South India lamah hian an uar zual deuh in kei ka hmu a. An khawpui chhungah han vah kual deuh chuan, kawngsir velah te, Rel chhungah te leh hmun tin maiah hian an zuar hmuh tur a awm. Sei tak tak in an phiar mawi em em. A phiartu te pawh hian an thiam zeih zeih hle a ni. Ka hmuh hmasak ber chuan din chilh meuhin an phiar dan ka en reng mai.

Pangpar hian hnamtin ah hmun a luah zau hle mai. Mahse kan chelek dan leh hman dan chu in ang lo khawp in ka hria. Keini Mizo te hian taksa a in cheinna a tan em chuan kan hmang meuh lo. Mahse south Indiaah te hi chuan in cheinna mawi takah an ngai a. An hmeichhiate hian an in bel uar hle. Kei ni chuan kan huan a, kan par vul chek tir bak loh chu a hman ngaihna ka hriat loh laiin, South Indian mi tan chuan an nitin chaw bel leh in cheinna mawi tak lo ni ve leh zel a. Engkim Siamtu ropui Lalpa hian keini mihringte tan hian ro a va rel kim tak em!















Jasmine pangpar chu sei tak tak in an phiar a.... an zuar mai thin...
















Ti hian in cheina mawi takah an hmang mai.....       

8 comments:

Mizohican said...

Haha Jasmine hi chu ka hne tawpssss... kum 4 college ah, nitin classmate hmeichhe ho hnungah kan thu a, he pangpar hi an vuah thup hian... luak a ti chhuak tawh a rim hian!

Varte said...

Hmanlai hla, "Rinawmin aw,Jasmine" tihte pawh a awm kha mawle.

A par hi a tam tham chu a nalh ve khawp mai, a rim lah hi a na zek, a nam chuk zel a.

Zan khaw thiang tak, thlifim thaw heuh heuh kara a rim rawn nam chem chem hi a rimtui duh bik...

Irene said...

@Illusion...hahaaa..nia a rim hi ngai thei lo tan chuan rim chhe ve tak ni. Ka hrethiam che.

Nitin mai a i classmate ten an sam a an khim ziah chuan ninawm duh ngawt ang le. A rim ngaina lo tan chuan. Kan officah hi chuan an phal lo hlauh mai office hun chhung hi chuan. A rim ka hre tlem deuh kei chu.

Irene said...

@Varte i hla rawn sawi khi lung a va han ti leng em em...kan sa ve nasa thin alawm.

Mizo hi chuan pangpar khawi lam hi kan uar bik deuh a,chuvang chuan Jasmine hi chu kan hmang tam em em lo. A par tam chuan a mawi ka ti.

A rim tui i tih zawng nih chuan south india lamah awm chi tak i ni ang heee..heee....

Jerusha said...

Keipoh Jasmine hi chung a rim hi vai ho zing ah cheng rei tawh chuan ngainat a har. Mahse a rim hi a strong loh chuan a mawi chu ka ti ve reng, hetia tam deuh a rem mawi deuh a special occasion a an han dah that hi chu, hnar ping that chuan a mawi tawps!

Irene said...

@Jeru... ni e a rim mawlh hi a ngai thei lo tan chuan a rim hi na mah2 a. Vai rim ka ti mai thin a kei pon..hee.hee...

Occasion lian tham deuh ah phei hi chuan an hmang uar leh zual a, an khim uar thei khawp mai. "Hnar ping" tih lai tak khi...haaa...haaa...

Te-a said...

I pangpar bawmah ka lut ve a, a rimtuina ka tem phakin ka hria,

Irene said...

@Te-a...i rawn leng teh nawlh chu ka lawm e.

Hetiang pangpar hi keini mizo hman dan nen in ang lo vei em a kan ziak lang a nih hi. Keini chuan hmanna tur kan hre tlem zawk em a ni.An han phiar vel dan pawh hi an creative ka ti khawp a sin.